أنا مش مصرى
لما ازوغ كده من شغلى
واما الدخان يأكل عقلى
وأطنش لو حد ندهلى
وأهمل بيتى
وزرعى فى غيطى
وأعيش الفوضى
وأقول زيطى
وأما أقوم من نومى العصر
ويوماتى أسهر للفجر
وأقضيها كدب وفَشر
وأذى الناس بكلامى المُر
يبقى أنا مش مصرى
لما أزعَل منى جيرانى
علشان تليفزيونى العالى
وأما يقولوا وطى شوية
أقلب وشى وأقول أنا مالى
وأما أرمى زبالتى على السلم
ولا عايز أفهم ولا أتعلم
وأما أركن عربيتى مخالف
ومن غير رخصة
وماشى بالعكس
وأكون عارف بس مطنش
وأقول كله بس يهُس
فينا كتير من السلبيات
لو نعدلها بلدنا هاتقوى
وهاتفضل دايما الأقوى
كفاية كلام وقعود على القهوة
ولازم تبقى راجل عصرى
ونشاور ونقول المصرى